Oiso da warn's wieda, meine krankhaften Zuckungen unterhoib da Gürtellinie,
da rechte Fuaß&xnbsp;muaß imma Gas gem und da linke mächt de Zahnradl
aufedreim. Mei Psycho...Dings-Bums (i konns ned schreim) sogt imma des muas ma
heiln mid a na "Ringkur". Oiso was gibt's scheenas als an Ring, nämle an
Salzburgring! Und des bei herrlichstn Spädsommawedda.
Ogreist war ois was in da Renngschicht amoi an Nama ghabt hod und ollawei
no hod. Forme 1 bis 3, sämtliche Artn von Vau und Supervau, a Ösi wa a
do mit so am superneia Schlitten von da andan Seidn vom großen Deich und
dann natürle die Oidn. Ferry's sämtlicher Colleur, vom 904 bis 935
und natürle 911 in olle Variationen. Mercedes (koane Daimler Chrysler)
300 SL vom Roadster bis zum Flügler, Veritas (scheene Wagerl), BMW 328
und des neizeitliche von Renault Alpine bis zum NSU. Einfach ois hoid,
mei is des schee!!! Mann kos' leida ned olle aufzein.
Tja was gibt's zum fahrn zum schreim? Eigentli ned fui, aussa das an riesigen
Spaß&xnbsp;gmacht hod. De ham mi dann higschdeid zu de ganzn Narrischn, da
moan i de Österreicher mit eanane "Kattus Frizzy Autos" vom Histocup"
(Des san glabe lauter Ferngschdeierde). Des war dann de gräßte
Startergruppn mit fasst 40 Leid auf da Straß&xnbsp;wo 35 wissn woiddn wo da
Bartl an Most hoid. Mei war des schee. Man hod hoid seine Gruppn build und mid
dene is ma dann im Kreis gfarn - aba wia! I hob ma an Ford Mustang ausgsuchat
und an 3,0 CSL.
I war zwar immer nur da 3de Gwinna, aba in de Kuavn hob is eana
immer wieda gem, mei war des erst recht schee. Mit meine boa dagwetschdn 160
Pferdel gega de Hubraumriesn ala BMW und den Ami. Wia war de Gschicht midm
Goliath und dem Andan ? Tja so san 3x20 Minutn umaganna wia im Flug. Oa Lauf
war scheena wia da anda. Da letzte midm Indystart lasst natürle was richtigs
umakemma vom "Feeling". A Zeid hods a amoi gem und des warn dann a Minuten und
zwoarafuchzg Sekundn und a boa dagwetschte für de schnellste Rundn. Obs
schnei war woas i wirkle ned, aba oans woas i gwies:
Es war eine wunderbare Veranstaltung die zum Mitmachen verleitet.
Mia säng uns next Joar wida, do hob i dann a Slicks drauf und dann kennas
kemma de von da Kattus Fraktion!!
Luftige und a bisse laude Boxergriaß aus Zangberg,
Jürgen